BUTUAN CITY – Nagpahinumdom ang usa ka campaign officer sa environmental non-government organization nga BAN Toxics sa publiko nga importante kaayo ang maampingong pagtan-aw ug pagbasa sa label sa mga swimming floater, ilabi na karong ting-init.
Sa interview sa Bombo Radyo kang Thony Dizon, campaign officer sa maong grupo, iyang gipahayag nga sa ilang pagsusi sa Metro Manila ug apil sa Tacloban sa panahon sa sampling, mipalit sila og mga swimming floater ug nakit-an nga ang uban niini adunay tulo ka klase nga kemikal sama sa lead, mercury, ug cadmium.
Sumala sa ilang pagtuon, kadaghanan sa nasusi nga produkto kulang sa impormasyon sa label, nga nagpasabot nga dili kini nakapasar sa pamantayan sa Toy and Games Safety Labeling Law sa Pilipinas.
Taliwala sa dugay na nilang panawagan, giklaro ni Dizon ang panginahanglan nga susihon ang nagtunhay nga mga polisiya ug tukion ang mga gaps o kakulangan sa implementasyon tungod kay mas maayo matud pa nga i-review kini, labina sa bahin sa pag-angkat sa mga produkto.
Gidawat usab niya nga kadaghanan sa maong mga produkto imported ug wala mu-agi sa sakto nga inspeksyon, busa lisod matino kung kinsa ang manufacturer, importer, ug distributor, ug unsaon kini pagbalik kon mapamatud-an nga delikado ilabina nga dili igo ang impormasyon nga nakabutang sa label aron makasubmite og angay nga kaso o reklamo.
