BUTUAN CITY – Blangko pa ang mga overseas Filipino workers kon OFWs nga atua sa New York City kung kanus-a matapos ang mga pro-Palestinian protests bisan pa man og nanginlabot na niini ang kapulisan human nga wala na makaya pa university security forces ang ilang presensya.
Sa eksklusibong pakighinabi sa Bombo Radyo Butuan, gipadayag ni Bombo international correspondent Annjo Moste Balbutin direkta gikan sa Manhattan, New York diin siya nagtudlo ug nahimutang ang Columbia University nga usa sa mga unibersidad diin duna’y nagrali nga mga estudyante, dugay na matud pa ang maong pro-Palestinians protests ug nagkadako lang tungod kay gusto sa mga estudyante nga klarong kondenahon sa kagamhanan sa Estados Unidos ang padayon nga pag-atake sa Israel ngadto sa mga Palestino sa Gaza Strip.
Ang mas gikasuko sa mga estudyante mao ang padayong pagsuporta sa Amerika ngadto sa Israel taliwa sa dayag nga pagpamatay matud pa niini sa mga sibilyan ilabina dihang nadiskubrehan ang mga mass graves diin gipanglubong ang kapin sa 300 ka mga tawo.
Hinuon, business as usual gihapon ang New York tungod kay dili matud pa sila apektado sa maong mga lihok protesta.
Samtang sa pagkakaron, wala pa siya’y personal nga ka-ilang Pinoy nga misalmot sa rali gawas lang sa duha ka anak sa iyang ka-ila.
