BUTUAN CITY – Misaka ang presyo sa lana human sa engkwentro tali sa United States ug Iran sa Strait of Hormuz, nga naghatag og pagsulay sa ilang huyang nga kasabutan alang sa paghunong na sa gubat.
Ang presyo sa Brent crude futures misaka hangtod 7.5 porsyento atol sa kusog nga paglihok sa merkado niadtong Huwebes, apan mikalma pag-abli sa merkado sa Asia sa Biyernes sa buntag.
Ang internasyonal nga benchmark miabot sa $101.12 matag bariles pag-abot sa alas- 3:00 sa kaadlawon kansa ubos gamay gikan sa pinakataas nga $103.70 sa maong adlaw.
Ang pinakabag-ong pagsaka sa presyo nahitabo human nagbinayloay og opensiba ang US ug Iran sa mahinungdanong strait, nga agi-anan sa mga usa ka ikalima sa suplay sa lana ug natural gas sa kalibotan, bisan pa man sa gipatumang ceasefire sukad niadtong Abril 7.
Ang presyo sa Brent misaka og mga 40 porsyento kumpara sa wala pa magsugod ang gubat, taliwala sa gibanabang kakulang sa adlaw-adlaw nga produksyon nga 14.5 milyon ka baril.
Mibukas usab nga ubos ang stock markets sa Asia niadtong Biyernes tungod sa tumang tensyon, diin ang benchmark nga Nikkei 225 sa Japan, KOSPI sa South Korea, ug Hang Seng Index sa Hong Kong matag usa mikunhod og kapin sa 1 porsyento.
Sigon sa United States Central Command o CENTCOM, naglusad sila og opensiba batok sa Iran human gi-ataki ang tulo ka guided-missile destroyers sa US Navy pinaagi sa mga missiles, drones ug gagmayng sakayan sa Iran sa maong strait.
Sa sayo pa, gi-akusahan sa Khatam al-Anbiya Central Headquarters ang US nga nilapas sa ceasefire pinaagi sa pag-atake sa usa ka Iranian oil tanker ug laing barko duol sa maong katubigan.
