BUTUAN CITY – Dako kaayong dungog alang sa Caraga Region higayong mahinayon ang pagtudlo kang Atty. Mark Tolentino isip sunod nga kalihim sa Department of Environment and Natural Resources kon DENR human gibasura sa Commission on Appointments ang pagkumpirma kang Gina Lopez.
Sigon ni Banza, Butuan City Brgy. Captain Nestor Amora, usa sa mga orihinal nga membro sa PDP-Laban ning rehiyon si Atty. Tolentino og mao ang kasamtangang provincial chapter president sa nasangpit nga partido dinhi sa Agusan del Norte.
Hugot nga gisuportahan sa PDP-Laban Butuan chapter ang posibleng katudluan ni Atty. Tolentino sa maong posisyon og duna matud pa sila’y inisyatibong giplanuhang himuon aron mapadulong sa Agusanong abogado ang nasangpit nga posisyon.
Dugang ni Kapitan Amora nga bisan og batan -on pa si Tolentino apan ha-um na kini sa maong posisyon ilabina nga dili supak sa mga adbokasiya ni Lopez ang mga adbokasiya usab sa maong abogado diha sa pag-atiman sa kina-iyahan.
Posibleng magpagawas na og desisyon si Pangulong Duterte kung kinsa ang iyang matudlo sa maong posisyon sulod sa duha ka semana gikan karon. (Beth Ruiz)
