BUTUAN CITY – Gitun-an karon sa pamilya ni Rene Clert Baterbonia, ang Ateneo student-athlete nga nalumos-patay sa Dipaculao, Aurora ang posibleng pag-file og dugang reklamo kon supplemental complaint kabahin sa iyang pagkamatay.
Sigon sa abogado sa pamilya nga si Atty. Israelito Torreon, naghulat pa sila sa kopya sa reklamo nga gisubmite sa Criminal Investigation and Detection Group kon CIDG ngadto sa Department of Justice kon DOJ may kalabotan sa posibleng paglapas sa Anti-Hazing Law.
Dili pa siya makahatag og klarong komento tungod kay wala pa niya nabasa ang sulod sa reklamo, taliwa nga katingalahan nga wala pa hatagi og kompleto nga kopya niini ang pamilya.
Nasayrang wala makatambong si Torreon sa briefing sa CIDG kagahapon tungod sa trapiko, apan duna’y nakatambong nga iyang associate ug laing abogado.
Giklaro pa ni Atty Torreon nga samtang anaa pa sila sa Agusan del Sur, gipirmahan na sa pamilya ang mga dokumento ug gisumite na ang reklamo dungan sa pagbutyag nga pwede pa silang maghimo og dugang aksyon ubos sa balaod.
Gihisgutan usab nila ang pamahayag ni Interior Secretary Jonvic Remulla nga pwede pa mausab ang listahan sa mga respondents rason nga gitan-aw sa pamilya nga mag-file og supplemental complaint aron maapil ang uban pang tawo nga sa ilang lantaw, responsable sa maong insidente.
Una nang girekomenda sa CIDG ang preliminary investigation batok sa nag-resign nga si kanhi Ateneo head coach Tab Baldwin ug laing 10 nga nalambigit sa team-building activity sa Aurora diin namatay sila Baterbonia ug Divine Adili.
