BUTUAN CITY – Hugtanong gisupak sa Makabayan bloc ang planong pagtukod og Pax Silica industrial hub sa Capas-Tarlac ug tanan nga makutay niini.
Nasayrang ang Pax Silica, usa ka international initiative nga gipangunahan sa Estados Unidos nga nagtumong sa paghimo ug mas lig-on ug kasaligan nga supply chain alang sa mga teknolohiyang kritikal sa artificial intelligence (AI) ug semiconductors kon computer chips. Kamatu-uran niini, nagduso na sila og resolusyon niadto pang unang semana sa Hunyo ning tuiga aron imbestigahan ug ma-utingkay kung sa unsang paagi nagka-istorya ang Estados Unidos ug Pilipinas alang sa maong plano.
Sa eksklusibong pakighinabi sa Bombo Radyo Butuan, gipadayag ni Kabataan Partylist Rep Renee Louise Co nga unang tinguha sa Amerika ang mga applicable sa maong proyekto ang United States diplomatic laws kansa nagpasabot nga kinahanglang dili balaud sa Pilipinas ang sundon apan wala kini madayon tungod kay sa ilang lantaw, gibabagan kini sa kagamhanan.
Nagpakita matud pa kini sa kadalo ug ka-excited sa Amerika nga kuptan ug kontrolon ang 4-mil ektaryang kayutaan sa Pilipinas uban sa mga rekursos naturales alang sa managlahing katuyuan sama sa ekonomiya apan ang gikabalak-an sa kadaghanan, ang posibleng pang-militar nila nga katuyuan sa nasud.
Gipasabot sa kongresista nga aware na sila sa dili patas nga terms sa maong plano alang sa katawhang Filipino taliwa nga magamit pa ang mga rekursos naturales sa nasud.
Kini ang rason nga niadto pang buwan sa Mayo nila gikampanya nga kinahanglan nilang babagan ang pagsulod niini tungod sa kasaba karon sa gika-ingong tumong sa plano pagtukod og mga data centers alang sa artificial intelligence systems.
Nasayrang planong pirmahan ang framework agreement alang sa AI industrial hub sa New Clark City karong Nobyembre human napirmahan ang Declaration of Inclusion niadtong Abril 17 ning tuiga pinaagi ni Trade Undersecretary Ceferino Rodolfo, nga nagpasabot sa opisyal nga pag-apil sa Pilipinas sa inisyatiba.
Dugang ni Co, mapugngan sa katawhan ang gikatakdang pagpirma sa Pilipinas sa maong kasabutan nga maoy angayang buhaton ilabina nga duna’y limitasyon ang pag-imbestiga sa House of Representatives niini.
Kini samut na nga gipahibalo na ni Pangulong Bongbong Marcos sa iyang State of the Nation Address kon SONA suportado niya ang maong inisyatiba.
