BUTUAN CITY – Gikuwestiyon sa prosecution ang managlahing pagpasabot sa Office of the Vice President o OVP sa paggamit sa confidential funds ni Vice President Sara Duterte.
Sa impeachment trial, gitumbok ni Atty. Mae Divinagracia nga nagkalain-lain ang rason nga nakalatid sa mga dokumento sa OVP lakip na ang Good Governance Program, socio-economic delivery program, ug surveillance activities.
Gi-angkon usab ni OVP Assistant Secretary Lemuel Ortonio nga dunay upat ka managlahing pagpasabot para sa parehong confidential funds. Tungod niini, gibutyag ni Divinagracia nga kung mag-usab-usab ang hinungdan posibleng namakak o usa lang lang kini ka “scam” .
Daling mipalag niini ang depensa nga gipaboran usab ni Senate Impeachment Court Presiding Officer Francis “Chiz” Escudero, dayong mando sa clerk of court nga tangtangon kini nga pulong sa impeachment trial records.
Gikumpirma usab ni Ortonio nga nasayud ug gi-aprubahan ni Duterte ang mga lakang mahitungod sa confidential funds gikan sa pag-request sa Department of Budget and Management kon DBM, pagpagawas ug paggastos, hangtud sa liquidation ug pagtubag sa mga audit findings.
Samtang gipasidan-an usab ni Escudero ang duha ka panig nga mag-amping sa paggamit sa mga pulong nga mamahimong makabaton og epekto sa gawas sa korte.
