BUTUAN CITY – Giklaro ni Eldie David tigpamaba sa Butuan City Transportation and Traffic Management Department (CTTMD), nga bugtung ang mga driver lamang nga nakatsinilas ang sikopon sa ilahang buhatan tungod kay mao lamang kini ang anaa sa ilahang lokal nga ordinansa.
Sigon sa maong opisyal sa eksklusibong pakighinabi sa Bombo Radyo Butuan niini niadtung Hunyo 27, pasabot matud pa nga kung sila ang manakop, dili apil ang mga back riders ang ilahang sitahon.
Apan wala nagpasabot nga pwede ra nga magtsinilas ang mga angkas tungod kay subay matud pa sa kamanduan sa nasyunal nga balaod pinaagi sa Republic Act 4136 sa Land Transportation Office, mamahimo matud pa nga sitahon og apil ang mga back riders.
Pagklaro sa maong opisyal nga namesyon lamang niini nga apil ang back rider niadtung unang niyang pamahayag sa Bombo Radyo Butuan tungod sa nasangpit nga nasyunal nga balaod.
Dugang niini, giawhag usab sa nasangpit nga personahe nga motuman nalang sa maong ordinansa tungod kay sukad sa pagpalit sa mga nagbaton og sakyanan o motor sa ilahang gamit, nasayod naman sila kung unsa ang ginadili o ginatugot sa balaod.
Kahibaloan nga dugay nang balaod ang pagpangdakop sa mga driver nga naka-tsinelas apan gipakusgan lang kini dinhe sa siyudad human na-aprubahan niadtong Marso 1 ang bag-ong transportation and traffic code ordinance ning siyudad.
