BUTUAN CITY – Gipangayuan na og pagpasabot sa kadumalahan sa Agusan del Norte Provincial Hospital ang ilang medical staff nga naka-duty og nakahupot sa namatay’ng pasyenteng si Jenaica Sara Rementizo aron masayran ang ilang panig sa alegasyong ilang gipasagdan ang nasangpit nga pasyente taliwa sa pagreklamo matud pa niini nga maglisod na sa pagginhawa.
Sa eksklusibong pakighinabi ning sibyahan, gibutyag ni Lexter Dolotina – admin officer sa maong ospital, nga dihang gipa-abot kaniya ang maong concern ni Atty. Doropan – legal counsel sa provincial capitol, nagpagawas gilayon siya og memorandum aron makuhaan sa ilang panig ang mga hingtungdang hospital staff.
Magdepende matud pa sa tubag sa maong mga trabahante ang iya unyang ipagawas nga official statement in behalf sa maong ospital.
Aminado siyang wala sila’y nadawat nga formal complaint apan base na usab sa tambag ni Atty. Doropan, mihimo na siya og inisyal nga lakang aron ma-imbestigahan ang maong kaso.
Mas maayo matud pa nga magpadala og formal complaint ang hingtungdang pamilya aron duna’y ilang basehan sa himuong aksyon.
Mahinumdumang midangop ning sibyahan ang pamilya sa Sara ilabina si Shaneth Lasdose Sara aron hatagan og hustisya ang kalit nga kamatayon ni Jenaica Sara, Rementizo. residente sa Purok 5, Brgy. Sto. Niño, lungsod sa Magallanes, Agusan del Norte.
Malampuson matud pa kining naka-anak via Ceasarian Section kon CS tungod sa pagtaas sa iyang blood pressure apan pagka-kaadlawon mireklamo na kini ngadto sa ilang inahan nga maglisod kini pagginhawa kansa gibalewala lang sa staff on duty sa rasong normal lang matud pa kini sa mga gi-CS.
Kung wala matud pa mag-wild ang iyang inahan, dili mukuha og oxygen ang taga-ospital apan ulahi na ang ilang pag-aksyon tungod kay nakabsan na sa kinabuhi ang iyang manghod.
Mala-umon si Shaneth nga pinaagi sa pagduol nila ning sibyahan, mahatagan og hustisya ang nadangatan sa iyang manghod. (Beth Ruiz)
