BUTUAN CITY – Dakong hagit karon ang bag-ong trabaho ni kanhi Commission on Elections kon COMELEC officer ug swimming lawyer Atty. Ingemar Macarine ang pagtudlo kaniyang prosecutor sa National Prosecution Service kansa ubos sa Department of Justice kon DOJ.
Sa eksklusibong pakighinabi sa Bombo Radyo Butuan, gibutyag ni Atty. Macarine nga apil sa iya na karong trabaho ang pag-file og mga kasong kriminal batuk sa mga gidudahang kriminal.
Gamay’ng adjustment na lang matud pa ang iyang himuon sa bag-o niya karong assignment tungod kay dakong tabang man alang kaniya ang 13 ka tuig niyang pagtrabaho ubos sa COMELEC ug ang iyang 16 ka tuig nga pagka-abogado kondiin naghupot na usab siya og nagkada-iyang mga kaso.
Gawas sa paggukod sa usa ka akusado, apil sa iyang trabaho ang paghatag og pruweba nga nakahimo og krimen ang usa ka gi-akusahan.
Samtang bisan pa man ug anaa na siya sa na-assign sa national office, padayon gihapon ang iyang na-andan na nga paglangoy alang sa kina-iyahan apan kini higayong mawala na ang COVID-19.
Gani, apil sa iyang nakahan-ay karon nga languyan ang kadagatan sa Surigao del Sur ug Masbate.
Subay usab sa hisgutanang COVID nga makutay usab sa iyang kawsa alang sa limpyong kina-iyahan og kadagatan, gibutyag ni Atty.Macarine nga apil sa giproblema karon sa nasud ang nagkatag nga mga basura sa gipanggamit nga mga personal protective equipment kon PPEs, mga face mask ug face shields nga bisan asa na lang ipanglabay.
Kinahanglan matud pa nga mag-amping ang tanan sa pag-dispose niini aron dili mahimong polusyon nga mas makadaut pa sa atong panglawas.
