BUTUAN CITY- Posibleng makasinati og pag-rollback sa presyo sa mga produktong petrolyo sunod simana human mikunhod ang epekto sa tensyon sa Middle East sa global oil market, sumala sa Department of Energy kon DOE.
Gibanabana nga mahimong mokunhod ang presyo sa gasolina og hangtod 80 sentabos matag litro, diesel 50 sentabos matag litro nga pagkunhod, ug ang kerosene adunay pag-ubos og P2.30 matag litro.
Sigon pa sa DOE, nahupay na ang kabalaka sa merkado tungod sa pagkunhod sa geopolitical risks ug paglaom sa panagkasabot tali sa Estados Unidos ug Iran, bisan pa nga nagpabiling hugot ang suplay sa diesel ug gasolina.
Ang opisyal nga anunsyo sa oil price adjustment ipahibalo sa mga kompanya matag Lunes ug ipatuman sa adlaw nga Martes, human sa dakong pagsaka sa presyo sa lana nga gipatuman niadtong Hulyo 28.
