BUTUAN CITY – Mi-ani og managlahing reaksyon gikan sa katawhan sa Estados Unidos ang pagkahimo nang balaud sa pag-ban na sa Tiktok human gipirmahan na ni President Joe Biden ang balaudnong una nang gipapasar sa Senado.
Sa eksklusibong pakighinabi sa Bombo Radyo Butuan, gipadayag ni Bombo international correspondent to the US Ferdinand Nakila nga bisan og duna’y mga nagprotesta gumikan kay ma-apektuhan ang ilang panginabuhian nga gipaagi sa maong platform, mas daghan matud pa ang deadma lang niini.
Apil sa mga misupak matud pa sa maong balaud kadtong mga indibdiwal ug grupo nga nakigbisog alang sa gawasnong pagpadayag. Ang mga opponents matud pa niini nagtuo nga malimitahan ang ilang kagawasan sa pagpadayag.
Giklaro usab ni Nakila nga ang lakang pagduso niini nagsumikad panahon sa administrasyon ni kanhi US President Donald Trump dihang gi-ban siya sa X nga mao kaniadto ang Twitter.
Kasagari matud pa sa mga supak sa maong balaud mao kadtong wala makasabot sa gibug-aton sa hulgang hatud sa Tiktok kansang tag-iya mao ang Chinese company nga ByteDance nga dako matud pa ang posibilidad nga mukuha og mga impormasyon gikan sa ilang mga users.
Tungod kay gamhanan matud pa ang komunistang nasud sa China, kaya nilang mapa-comply ang ByteDance sa tanang gusto nilang kuhaong mga impormasyon gikan sa nasangpit nga app.
