BUTUAN CITY- Nagtuo si MP Promotions CEO Jas Mathur nga magpabiling dako nga atraksyon sa mga boxing fans ang rematch nila Manny Pacquiao ug Floyd Mayweather Jr. bisan paman nga nasibog ang away sa mga niini karung Enero sa sunod tuig.
Sumala ni Mathur, masaligon kini nga mahimong magmalampuson ug makatala og rekord ang pag-atbang na usab sa duha ka boxing legend tungod kini matud pa ang away nga gustong makita sa publiko.
Gi-insistar ni Mathur nga ang rematch nila Pacquiao ug Mayweather mahimong usa sa pinaka-dakong sporting events sa panahon sa streaming era.
Kahinumdumang gi-anunsyo ang rematch karung tuiga, apan gilayon usab kining gikweston sa pipila ka boxing analyst ug mga fans makab-ot pa-ba ang susamang interes nga nakuha sa ilang unang away niadtong 2015.
Sa unang panag-agbat sa duha, mingdaog si Mayweather pinaagi sa unanimous decision. Daghan usab ang nadismaya tungod wala matud pa nahimong mas aksyon ang away sama sa gilaoman tungod sa padagan nga depensa ni Mayweather.
Gawas niini, parehas usab nga anaa na sa kataposang era sa ilang karera ang duha ka boksingero. Sa oras sa gitakdang rematch sa Enero, dul-an 50 anyos na si Mayweather samtang 48-anyos usab si Pacquiao.
Bisan paman, nagtuo si Mathur nga dili mahimong babag ang edad sa duha ka atleta tungod pareho matud pa ang mga niini nga talagsaong personalidad sa kalibotan sa boksing.
