BUTUAN CITY – Gipatas-an na karon sa Commission on Elections kon COMELEC-Butuan ang oras sa ilang nagpadayong voter’s registration gikan sa alas-otso sa buntag hangtud sa alas-singko sa hapon sa adlaw’ng Lunes hangtud Biernes ngadto na sa alas-siete sa gabii.
Sa eksklusibong pakighinabi sa Bombo Radyo Butuan, gipadayag ni city election officer Samuel Rollo nga kung holiday sama kagahapon ug sa adlaw’ng Sabado, kutob lang sila sa alas-singko sa hapon bisan og padayon ang ilang rehistrasyon sa ikaduhang andana sa SM City Mall.
Kutob lang sa Septembre 30 ang ilang deadline sa rehistrasyon ug karon pa lang, taas na ang turn-out human ang suspensyon tungod sa pagpa-ilalom sa Butuan sa Modified Enhanced Community Quarantine kon MECQ gikan niadtong buwan sa Hulyo.
Tungod niini, plano nila karon nga magdugang og personahe aron ma-cater ang mga magparehistro ilabina nga kada-adlaw, tag-500 ka mga indibidwal ang ilang ma-cater.
Apan bisan pa man sa kadaghan sa mga aplikante, gipaniguro ni Atty. Rollo nga wala’y angayang kabalak-an tungod kay mikooperar man ang tanan ilabina sa pagsunod sa minimum health protocols nga iyang gikalipay.
Duna matud pa’y higayong nga tungod sa ka-busy magkadug-ulay na ang mga rehistrante apan mabadlong ra gihapon kini sa ilang mga personahe.
Kini ilabina kung diha sa ilang buhatan himuon ang rehistrasyon gawas lang sa mall diin matabangan sila sa mga gwardiya nga mabadlong ang mga makalapas sa health protocols.
