BUTUAN CITY – Hugot nga gihimakak ni Ka Omar Ibarra, nagpa-ilang tigpamaba sa News People’s Army kon NPA-Agusan nga sila ang responsable sa pagpamusil-patay sa tulo ka mga lumad nga miyembro sa Higaonong Manobo ning mi-aging alas 3:00 sa kaadlawon sa Sitio Labong, Brgy. Simbalan sakop sa lungsod sa Buenavista, Agusan Del Norte.
Hinoon gikondena niini ang maong pagpamusil dungan sa pagbutyag nga binuhatan matud pa kini sa mga miyembro sa CAFGU ilalom sa 23rd Infantry Battalion, Philippine Army og miyembro sa paramilitary group kaniadto nga Bungkaso Liberation Front kon BULIF.
Gipanganlan pa niini ang maong mga suspetsado nga sila Bana Mansamahan, Tawi Mansamahan, Lipak Mansamahan, ug Rommel But-anon nga mao matud pa’y mipatay nila Alfredo Timaquin Sr., 61-anyos og mga pag-umangkon niining sila Paka Pinatugao, 47-anyos og Pina Pinatugao, 48-anyos, pulos mulupyo sa Purok 7, Sitio Bagan, Brgy. Simbalan sakop sa maong lungsod.
Nahisgutan pa niini ang pangalan ni Agusan Del Norte ex-officio Board Member Eddie Ampyawan, o “Datu Bawang” isip representante sa Indigenous People kon IPs diin iya matud pang mga tawo ang nasangpit nga mga suspetsado.
Pagbutyag pa ni Ibarra, gitahapan ang mga biktima nga supporters sa NPA rasong kini gipangpatay.
Subay niini, gihagit ni Ibarra si Lt. Col. Francisco Molina nga papanubagon ang mga suspetsado.
Samtang gidugang usab niini nga gawas sa Oplan Lakbay Hukay nga gipahigayon sa gobyerno, dunay extrajudicial killings nga ilang binuhatan.
Gani 6 ka mga lider nga lumad ang gipatay sa Agusan Del Norte ug Agusan Del Sur sukad niadtong Oktubre 17 hangtud sa Nobyembre 7 ning tuig 2018.
Ang nag-unang rason matud pa sa pagpamatay sa mga lumad mao ang pagsupak nila sa planong pagsulod sa mina ug plantasyon diha sa kabukiran sa nahisgutang probinsiya kansa hugot nga gipanghimakak sa opisyal. (Rolan Janea)
