BUTUAN CITY- Gigukod na sa National Bureau of Investigation kon NBI ang mga anaa likod sa pag-hack sa pipila ka government websites sa nasud.
Sumala ni NBI Director Melvin Matibag, nga nasuta na nila ang mga indibidwal nga posibling nalambigit sa insidente ug kasamtanga na nilang gi-imbistigahan aron makapanubag sa balaod.
Sigon sa NBI nga ipadayon nila ang imbestigasyon ug patubagon ang mga responsable tungod klaro nga adunay paglapas sa balaod ang ilang gihimo.
Una niini, usa ka grupo nga gitawag og Nullsec Philippines ang ming-ako sa pag-hack ug pag-utro sa pipila ka parte sa website sa gobyerno. Adunay mga mensahe usab matud pa silang gibilin nga mga pasidaan ug pagbatikos sa Senado.
Samtang, gitaho usab nga ang website sa House of Representatives nabiktima sa susamang cyber attack, kung asa adunay mga mensaheng nagtarget sa gobyerno kalabot sa isyu sa korapsyon ug pagsalig sa publiko.
Giklaro usab sa Cybercrime Investigation and Coordinating Center (CICC) nga walay sensitibong impormasyon ang nakuhang data sa mga hacker.
Matud pa sa CICC, ang na-apektuhan lang mao ang mga pampublikong website ug dili ang mismong internal systems sa mga ahensya sa gobyerno.
Gipasabot usab niini, nga ang mga website kinahanglang bukas sa publiko hinungdan nga nahimo kining target sa mga posibleng lungag sa seguridad.
Padayon karun ang imbestigasyon sa mga awtoridad aron masuta ang gilapdon sa pag-atake ug mapugngan ang susamang isindente sa umalabot.
