BUTUAN CITY – Gilimod ni National Security Adviser Eduardo Año ang akusasyon sa 18 nga nagpa-ilang Marines nga nakadawat siya og paper bag nga dunay sulod nga daghang kwarta human makigkita nila kanhe Congressman Zaldy Co, kanhe House Speaker Martin Romualdez ug Rep. Leila de Lima sa Polo Club townhouse.
Gitin-aw ni Año nga bisan kanus-a wala siya mitambong sa bisan unsang tigum kauban sila Romualdez, Co ug de Lima sa nasangpit nga lugar o sa uban pang lokasyon ug wala usab siya midawat og bisan unsang paper bags o package gikan kanila.
Gitawag ni Año ang nasangpit nga pasangil nga walay kamatooran ug binuhat-buhat lang.
Matud pa, dili niya pasagdan ang bisan unsang pagsulay nga mantsahan ang iyang reputasyon ug gipamugos nga andam ang iyang legal team nga himoon ang tanang tukmang aksiyon.
Magpahigayon usab ang iyang buhatan sa ilang kaugalingong imbestigasyon aron matumbok kung ang nasangpit nga “malicious stunt” ang kabahin sa mas lapad pang paningkamot aron gubaon o i-destabilize ang mga institusyon sa gobyerno tungod kay timing ang isyu taliwa sa mga pagdungog sa International Criminal Court mahitungod sa mga kaso ni kanhe Pangulong Rodrigo Duterte, ika-40 nga anibersaryo sa 1986 People Power Revolution ug ang One Time Big Time mass action.
Gihagit usab ni Año ang publiko nga mahimong discerning ug dili magpadala sa sayup nga impormasyon ug gipaneguro nga magpadayon ang gobyerno sa pagtubag sa lehitimong concerns pinaagi sa tukmang channels ug pagpatunhay sa rule of law sa tanang higayon.
