BUTUAN CITY – Mu-atubang sa pinakadakong hagit sa iyang karera si Japanese boxer Naoya Inoue sa umalabot nga away unya nila sa iyang kababayan nga wala pa mapildi nga si Junto Nakatani karong Sabado atubangan sa 55,000 ka manan-away sa Tokyo Dome.
Si Inoue, nga mao ang undisputed super bantamweight world champion, mudepensa sa iyang mga titulo sa ikapitong higayon batok sa kusgan nga southpaw nga si Nakatani.
Pareho silang adunay 32-0 nga rekord, mao nga gi-isip kini nga usa sa pinakadakong boxing match sa kasaysayan sa Japan.
Sigon sa 33-anyos nga si Inoue, nasabtan niya pag-ayo ang estilo ni Nakatani sa pagpakig-away.
Nasayrang mas mubo og tulo ka pulgada si Inoue kumpara kang Nakatani kinsa lima ka tuig usab nga mas bata kaysa kaniya dayong butyag nga bisan unsaon niya pagsugod sa away ug sa unsang pamaagi, maoy iyang gamiton.
Si Inoue, nga nailhan sa iyang kusog nga knockout power, adunay 27 ka knockout kumpara sa 24 ni Nakatani ug kini usab ang iyang unang away karong tuiga human siya nakig-away og upat ka higayon niadtong 2025.
Nadag-an niya ang tanan niyang away dayong angkon nga gikapoy siya human sa iyang unanimous decision victory batok sa Mexican boxer nga si Alan Picasso sa Saudi Arabia.
Sa maong event, napildi usab ni Nakatani pinaagi sa unanimous decision ang Mexican boxer nga si Sebastian Hernandez sa iyang debut sa super-bantamweight division.
Tungod niini, nakuha niya ang oportunidad nga naka-agbat ang bantugang si Inoue, apan kinahanglan niya gamiton ang tanan niyang teknik ug kusog aron mapildi ang “Monster” nga si Inoue.
