BUTUAN CITY – Kapin sa 8 milyones ka tawo ang misalmot sa mga protesta sa lain-laing dapit sa Estados Unidos nga gitawag og “No Kings” protest, diin ilang gikontra ang mga polisiya nga gipatuman ni US President Donald Trump.
Lakip sa ilang gi-atake mao ang giyera sa Iran, paghugot sa immigration, ug ang padayon nga pagsaka sa presyo sa mga palaliton. Ang protesta gipahigayon sa Los Angeles, Boston, New York, Washington DC, Houston, Minnesota, ug daghang uban pa.
Sa Minnesota, gihandom usab ang mga biktima nga sila Renee Nicole Good ug Alex Pretti nga gipusil sa federal immigration agents. Mi-apil niini ang pipila ka showbiz personalities sama ni Robert De Niro ug singer Bruce Springsteen.
Hugot nga siguridad ang gipatuman sa mga otoridad kondiin pipila ka indibidwal ang nadakpan sa Los Angeles tungod sa pagsulay pagpanakit sa mga otoridad.
Gawas sa US, adunay usab mga protesta sa Paris, London, ug Lisbon, Portugal.
Nalabwan niini ang gidaghanon sa protesta nga gihimo sa “No Kings” niadtong Oktubre sa miaging tuig.
