BUTUAN CITY- Giduso matud pa karon sa Estados Unidos, Iran ug pipila ka regional mediators ang mga termino alang sa posibleng 45‑ka adlaw nga hunong-boto nga mahimong dalan sa permanente nga pagtapos sa giyera, base sa taho niadtong Lunes (oras sa Pilipinas).
Sumala sa impormasyon gikan sa upat ka tinubdan sa U.S., Israel ug rehiyon nga adunay kalabotan sa negosasyon, gisabotan ang usa ka two‑phased deal diin una, ang 45‑ka adlaw nga hunong-buto ug ang ika-duha, ang permanente nga resolusyon sa panagbangi. Posibleng palawigon ang hunong-buto kung kinahanglanon pa og dugang nga adlaw alang sa negosasyon.
Apan, sigon sa White House nga wala pa giaprubahan ni U.S. President Donald Trump ang panukala, samtang ang Iran usab wala mosugot human gipadayag sa Iranian Foreign Ministry nga adunay kaugalingong tubag sa mga kondisyon sa Amerika ug gidili ang mga ultimatum.
Ang maong proposal gipresentar sa daghang nasud aron mapahupay ang tensyon ug masugdan ang mas lawom nga hisgutanang pangkalinaw.
Samtang niini, si Trump mitug-an sa Wall Street Journal nga nagtakda kini og deadline hangtod Martes sa gabii aron ablihan sa Iran ang Strait of Hormuz, ug kung dili kini masunod, posible nga atakihon sa Amerika ang kritikal nga imprastruktura sa nasud.
