BUTUAN CITY – Wala’y nakitang problema si Tourism Secretary Bernadette Romulo-Puyat sa pagbukas na sa Surigao City government uban sa City Tourism Office sa Danawan Island Adventures didto sa Brgy. Danawan kansa naghanyag og mga water sports activities sama sa snorkeling.
Kini ang reaksyon sa kalihim sa eksklusibong pakighinabi sa Bombo Radyo Butuan human gipa-abot kaniya ni Department of Tourism kon DOT-Caraga regional director King Arina ang malampusong pagbukas na sa Danawan Island adventures isip bag-ong tourist destination sa rehiyon.
Nasayrang nahimong highlight sa launching ang ground breaking sa usa ka tourism pavilion.
Gi-promote ang Danawan pinaagi sa pagprotiher sa ilang mga marine resources, mga coral reefs ug white sand beach kansa maoy primary tourism resource sa nasangpit nga lugar.
Sigon sa kalihim, basta anaa lang sa Modified General Community Quarantine kon MGCQ ang usa ka lugar, mahimo nang buksan ang ilang ekonomiya apan mag-agad gihapon kini sa local government unit kon LGU.
Ang ila lang mao ang pagpahinumdom sa tanan nga obserbahan pa gihapon ang minimum health protocols aron masigurong malikayan ang pagtakod sa COVID-19.
Gidugang pa sa kalihim nga nag-survey sila aron masayran ang pulso sa katawhan kung gusto pa ba nilang mubiyahe taliwa sa pandemic ug kung unsa nga lugar nga gusto nilang adtuan.
Migawas sa survey nga gipangita sa mga travelers ang nature-based adventures, health and fitness ug uban pa nga parehong ania sa Caraga Region.
KIni tungod kay halos ang tanang tourism products nga gusto sa mga bakasyunista, ania man sa rehiyon ilabina ang open space kansa daling i-promote.
