BUTUAN CITY – Nabalaka na sa ilang seguridad ang mga residente sa Brgy. Olave og Sangay sa lungsod sa Buenavista, Agusan del Norte tungod sa padayong engkwentro tali sa mga rebeldeng New People’s Army kon NPA og sa kasundaluhang sakop sa 23rd Infantry Battalion, Philippine Army.
Sa pakighinabi ning sibyahan, gibutyag ni Linda Taray, residente sa Brgy. Olave nga nag-panic ang mga residente sa ilang lugar apil na sa Brgy. Sangay tungod sa mga gipabusikad nga bomba atol sa engkwkentro kaganinang buntag.
Nangsugod matud pa ang engkwentro pasado alas-sais sa buntag nga gisundan sa alas-onse sa buntag pinaagi sa gihulog nga unom ka mga bomba, wala pa’y labot sa laing bombang gihulog dapit sa tunghaan sa Upper Olave.
Gikabalak-an niya ang ilang seguridad ilabina ang kabataan nga nanghilak na tungod sa kahadlok samtang nalisang na usab ang mga magtutudlo.
Samtang nagpadayon ang pursuit operations sa kasundaluhan human ang engkwentro sa Sitio Malambago, Brgy. Sangay, nga natigayon atol sa security patrol sa kasundaluhan.
Sigon ni Captain Edwin Leo Francisco sa 23rd IB, wala’y nakalas sa ilang grupo apan posibleng duna sa panig sa mga rebelde tungod sa lama sa dugo sa encounter site nga gibiyaan sa walhong grupo. (Beth Ruiz)
