BUTUAN CITY – Gidid-an na ang faculty and staff sa mga tunghaan sa Washington DC paghimo og mga kalihukan sa gawas tungod aso nga gikan sa wildfire sa Canada nga naka-abot na sa east coast sa Estados Unidos apil na sa Baltimore ug Virginia.
Sa eksklusibong pakighinabi sa Bombo Radyo Butuan, gibutyag ni Bombo international new correspondent Allan Camba kinsa usa ka magtutudlo ug nagtrabaho sa usa sa mga ospital sa Washington DC nga tungod usab kini sa dili na maayong Air Quality Index kon AQI nga tulo ka adlaw na nilang nasinatian.
Gani bisan sa recess time gawas sa tunghaan wala na sila tuguti pa aron makalikay sa posibleng kadaut nga mahatud niini ngadto sa ilang panglawas.
Alayon niini, matag-karon ug unya ang pagpahibalo sa US government sa update sa maong sitwasyon kansa nasinatian usab nila ilabina sa West Coast ning mi-aging tuig tungod sa wildfire sa California.
Sa pagkakaron, andam na ang mga ospital alang sa posible unyang pagbaha sa mga pasyenteng makasinati og respiratory problems kung magpadayon pa ang pagkaylap sa maong aso. Bisan matud pa sa mga warnings sa gobyerno nga likayan una ang paggawas sa ilang balay o bisan asa nila nga nahimutangan, duna pa gihapoy mga tawo nga magsuroy-suroy sa kadalanan.
