BUTUAN CITY -Nagpasidaan ang health authorities sa Democratic Republic of Congo nga mas lapad pa ang epekto sa Ebola outbreak tungod kay ang rehiyon nakigbatok sa talagsaon nga Bundibugyo strain nga walay aprubadong tambal o bakuna.
Gawas pa kini sa padayong pagkatap sa maong sakit sulod sa pipila ka semana nga wala ma-detect sa opisyal nga paagi sa wala pa ipahibalo ang outbreak niadtong Mayo 15.
Sigon sa mga analysts, hinay kaayo ang disease surveillance tungod sa pagkunhod sa global health aid ning mi-aging tuig.
Ang virus mikatap usab sa sidlakang bahin sa DRC, usa ka rehiyon nga adunay dugay na nga gubat ug taas ang kawalay pagsalig sa mga otoridad, kondiin lisod ang pagsubay sa mga suspected ug confirmed cases. Ang epicenter sa aong sakit mao ang Ituri province, duol sa utlanan sa Uganda.
As of Hulyo 21, kapin sa 2,500 ka mga kaso ug 1,000 ka patay ang natala, sumala sa World Health Organization kon WHO. Ang Uganda naka-report og 20 ka kaso ug duha ka patay.
Kung ikumpara sa 2018 outbreak sa DRC, molapas pa og 10 ka bulan sa wala pa maabot ang 2,000 ka kaso.
Nag-unang nakigbatok sa pagkatap niini ang mga health workers nga nag-atubang sa risgo nga matakdan, kakulang sa personal protective equipment (PPE), ug mga makamatay nga pag-atake gikan sa mga komunidad nga nagduda ug wala motuo sa virus, busa dili mangita og tabang medikal.
