BUTUAN CITY – Aminado ang Department of Social Welfare and Development kon DSWD-Caraga nga misaka ang mga kaso sa online sexual abuse and exploitation sa kabataan ning rehiyon gikan niadtong tuig 2018 hangtud sa 2022, mi-abot na sa 41.
Kini human nagbahad si DSWD Sec. Erwin Tulfo nga angayang ihunong na sa mga ginikanan ang paggamit sa ilang mga anak diha sa ilang panginabuhian.
Sa eksklusibong pakighinabi ning sibyahan ngadto kang Cath Aranas, tigpamaba sa DSWD-Caraga, gibutyag niining kini nga record, sa ila lamang buhatan ug wala pa’y labot ang mga hingtungdang local government units kon LGUs.
Misaka matud pa ang natalang ihap sa maong mga kaso tungod sa hini-usang paningkamot sa mga concerned government agencies nga nagtinguhang makunhuran kini tungod kay kadaghanan sa mga biktima niini mga minor-de-edad kon mga bata.
Aminado usab ang opisyal nga kasagaran sa mga petpetrators sa maong hitabo mao lang ang ilang kaugalingong mga inahan, mga iyaan, mga maninay ug uban ang mga ka-ila diha sa ilang palibot.
Base matud pa sa gihimong validation sa ilang mga social workers ang pagsuta sa mga rason nganong ila kining nahimo ngadto sa ilang nadugo.
Dinhi nila nasuta nga kini tungod sa kadako sa offer sa mga langyaw nga kostumer higayong makita ang pribadong pare sa lawas sa ilang mga anak kansa dakong tabang matud pa sa ilang panginabuhian.
Ikaduhang rason niini ang misconception sa mga perpetrators nga wala matud pa’y child sexual abuse nga mahitabo sa tungod sa kawala matud pa’y physical involvement kansa dakong sayop.
