BUTUAN CITY – Ang pagsa-ulog sa Pilipinas ning adlawa sa National Heroes Day, usa ka higayon aron pamalandungan ang nahimo sa mga nasudnong bayani alng sa atong nasud ug kanatong mga Filipino.
Sa eksklusibong pakighinabi sa Bombo Radyo Butuan, gipadayag ni Butuan City ug Agusan del Norte 1st District Rep. Lawrence Lemuel Fortun nga ning adlawa, dili lang ang mga nasudnong bayani ang angayang handumon kondili apil na ang wala ma-ilhi apan mihimo og mabayanihong lihok alang sa nasud kon kadtong gitawag nga mga unsung heroes.
Sigon sa kongresista, duna’y mga Pinoy nga hilom lang nga nakigbisog alang sa nasud, misakripisyo ug misugal sa ilang kinabuhi, mahatag lang ang kagawasang gipangandoy sa katawhan apil na ang kagawasan gikan sa gisagubang mga nasudnong problema.
Nanghinaut ang magbabalaud nga ang gihimo sa maong mga bayani padayong dumdumon sa katawhan.
Ning panahon sa pandemya nga hatud sa COVID-19, makonsiderang bayani ang mga frontliners nga maoy nanguna sa kampanya sa kagamhanan pagbatuk sa makamatay nga coronavirus.
Lakip niini ang mga doktor, nurses, barangay health workers, apil ang mga trabahante ,sa nagkada-iyang kompanya ug establisamiento nga padayong nagtrabaho taliwa sa kadelikado sa panahon.
Isip pagsaludo sa bayanihong gihimo sa mgfa frontliners, mas maayong bugtian kini sa tanan pinaagi sa pagsunod sa ilang hangyo nga musunod kanunay sa mga health protocols aron mapugngan na ang padayong pagkaylap sa coronavirus.
