BUTUAN CITY – Gi-anunsiyo na sa lokal nga kagamhanan ning siyudad sa Butuan nga dili na kolektahon ang basurang malata sugod karung Enero 2024.
Kini ang sumala sa post nga Strikto kining ipatuman sa City Environment and Natural Resources Office kon City ENRO human usab nauyunan sa mga barangay kapitan ning siyudad sa Butuan.
Katuyuan sa programa nga makab-ot ang zero waste management sa Butuan nga makuha lamang pinaagi sa pagtinabangay sa tanan.
Pinasubay kini nga lakang sa Executive Order no. 191 Series of 2016 nga gipagawas ni Mayor Ronnie Vicente Lagnada ilawom sa RA 9003 o mas naila sa Ecological Solid Waste Management Act of 2000, sa Section 5 sa SP Ordinance no. 2380-2002 lakip na ang SP Ordinance no. 3589-2010. Dinhi nakalatid nga ang segregation ug collection sa solid waste pangunahan sa barangay level ilabina ang biodegradable, compostable ug reusable wastes, obligado usab ang syudad sa pagkolekta sa non-recyclable materials ug special waste.
Giklaro sa City ENRO nga kolektahon lamang ang mga malata kung ang barangay adunay area nga kabutangan niini. Kung wala, adunay ipahigayong pinirmahay sa kasabutan sa kasikbit nga barangay aron didto mabutang ang malata nga basura.
Tungod niini, gihangyo sa lokal nga panggamhanan sa Butuan ang kooperasyon sa tanan nga mamahimong responsable sa pagdumala sa matag basura ug sugdan na ang pagpractice sa composting o bisan unsang paagi sa pagcompost sa malata nga basura sama sa compost pit, compost bin, ug uban pa.
Samtang kung mamalit batunan ang pagbitbit og sudlanan aron malikayan ang daghang basura sa ingon malikayan ang kadaot sa kinaiyahan.
