BUTUAN CITY – Gihagit ni Senador Alan Peter Cayetano ang palasyo sa Malakanyang, Department of Justice ug ang National Bureau of Investigation kon NBI nga ipadayon ang lawom nga imbestigasyon sa 2019 Southeast Asian kon SEA Games apan bugti niini, tugutan ang Senate minority bloc nga imbestigahan usab ang anumalusong mga flood control projects.
Sa iyang Facebook live, gipadayag ni Cayetano nga wala siya’y supak nga imbestigahan ang SEA Games nga iyang gidumala isip chairman sa organizing committee dayong butyag nga andam siyang makig-alayon sa bisan unsa mang imbestigasyon.
Ihatag matud pa niya ang tibuok kooperasyon sa himuong imbestigasyon ubos sa kondisyon nga ipadayon usab ang imbestigasyon sa lapad kaayo nga flood control scandal.
Alayon niini, gipanawagan usab ni Senador Alan Peter Cayetano ang Malakanyang nga aghaton sila Senador Ping Lacson ug si Senador Erwin Tulfo nga maoy chairman karon sa Senate Blue Ribbon Committee nga muhimo na og pagdungog aron madayon na ang imbestigasyon sa mga iregularidad sa flood control projects.
Gipadayag niini nga dili angayang kahadlukan ang bisan unsa mang imbestigasyon kung tumong niini nga mapagawas ang kamatu-uran. Duna na matud pa sila’y listahan sa mga testigong mahimong mu-atubang sa imbestigasyon.
