BUTUAN CITY – Wala damha ni Elma Rivera, 52-anyos nga magkita gilayon sila sa iyang igsoon nga 40 ka tuig na niyang wala makita, pila ka minuto lang human midangop sa Bombo Radyo kaganinang buntag.
Nasayrang gidala ni Cesar Zabala, taga-T. Calo Extension ning siyudad sa Butuan dinhi sa sibyahan si Elma Rivera, 52-anyos, membro sa LGBTQ community human nga nakita niya kining naglaroy-laroy sa ilang lugar kagahapon bitbit ang duha ka bag.
Sa pagsaysay ni Elma kinsa mas naila sa iyang pamilya sa dagnay nga Bebie, mibiya na siya sa poder sa iyang pamilya 40 ka tuig na ang nakalabay human nga mi-uban sa iyang iyaan padulong sa Manila ug didto na nakatrabaho sa usa ka paktorya.
Emosyunal kining misaysay nga nahugno siya dihang wala na siya’y na-abtan kagahapon.
Apan kini nahulipan og dakong kalipay human nga gi-anhian gilayon siya sa iyang maguwang nga si Alicia Rivera.
