BUTUAN CITY- Pormal nang gisugdan kaganiha Abril 17, ang Little League Philippines Series 2026 sa Ilocos Norte, diin kapin sa 170 ka teams nga gilangkuban sa kapin unom ka libo ka mga batang atleta nga nag-edad og 17 anyos paubos ang nakigkompetensya sa baseball ug softball. Andam na usab ang mga playing venues, billeting areas ug logistics, samtang ang Ferdinand E. Marcos Sports Stadium mao ang nag-unang venue sa torneo.
Gipakita niini nga kalihukan ang determinasyon sa probinsya nga palig-onon ang Ilocos Norte isip sports tourism hub sa Northern Luzon. Kini usab ang unang higayon nga gi-host sa Ilocos Norte ang national finals sa Little League human sa malampusong hosting sa Palarong Pambansa 2025. Ang kompetisyon molungtad hangtod Abril 25, ug sumala ni Mr. Michael Zialcita, District Administrator sa Little League Philippines, ang mga mananaog adunay higayon nga makarepresentar sa Pilipinas sa Asia-Pacific tournaments ug sa World Series sa Estados Unidos.
