BUTUAN CITY – Gisugdan na karong adlawa, Lunes, ang paghatag og libreng sakay ngadto sa katawhan sa Cabadbaran City ug ubang mga munisipyo sakop sa probinsiya sa Agusan del Norte.
Gipunduhan kini sa kagamhanang probinsiyal inabagan sa mga local government units nga dunay 50% counterpart nga maoy gamiton pagsweldo sa mga tricycle drivers, pang- abang sa ilang gimanihuang tricycle ug pangtubil nila sa kada-adlaw.
Ang Cabadbaran City dunay 60 ka tricycles kada-adlaw nga magbiyahe sa matag rota nga naghanyag sa libreng sakay samtang ang lungsod sa Carmen ug Jabonga adunay 15 ka mga tricycle, samtang tag-napulo usab sa Kitcharao ug Magallanes, 20 ang sa lungsod sa Nasipit samtang 15 sa RTR ug Santiago.
Ang maong programa, target ipatuman sulod sa duha ka mga bulan gikan ning buwan sa Abril hangtud Mayo kansa tabang sa probinsyal nga panggamhanan sa mga namasaherong tricycle drivers kinsa nag-atubang sa dakong hagit tungod sa kamahal sa presyo sa produktong petrolyo nga naka-apekto ug maayo sa ilang kinitaan ug panginabuhian.
