BUTUAN CITY – Giklaro ni PMajor Emerson Alipit, tigpamaba sa Butuan City Police Office nga magpadayon ang pagpahigayon sa mga ahensya sa gobyerno og Barangayanihan Caravan Towards National Recovery sa uban pang kabaranggayan ning siyudad.
Sa eksklusibong pakighinabi sa Bombo Radyo Butuan, gipadayag ni Major Alipit nga ang Brgy. Bit-os maoy unang barangay ning siyudad nga napahigayunan sa nasangpit nga caravan human ang giyera nga maoy nagpahikling sa mga residente sa Purok 3-A ug B tungod sa kahadlok nga mapagan.
Aminado ang opisyal nga daghang benepisyo ang mahatud niini ngadto sa mga residente tungod kay gawas nga libre na ang mga serbisyo, dili pa sila magastuhan og pamasahe gawas nga usa ka higayon lang ang ilang paghikay tungod kay mahulog man usab kining ‘One Stop Shop’ nga serbisyo.
Samtang sigon ni Rubelyn Beray, residente sa Purok 13-A, dakong tabang na alang kanila ang maong caravan apan mala-umon kining pinaagi niini, makita na sa gobyerno ang ilang nag-unang gikinahanglan sama sa panginabuhian nga sarang makatubag sa ilang inadlaw-adlaw nga panginahanglan.
Tungod kay legasiya man ni Pangulong Rodrigo Duterte ang maong caravan, nanghinaut kini nga matabangan silang mumaayo na ang ilang panginabuhian.
