BUTUAN CITY- Mopahigayon og laeng dagkong protesta nga gitawag og “White Ribbon Movement March” ang mga lider sa Simbahang Katolika, uban sa uban pang relihiyosong grupo, ug mga organisasyon sa civil society karong Hunyo 28 isip pagpadayon sa ilang panawagan batok sa korapsiyon ug alang sa mas lig-on nga pagpanubag sa gobyerno.
Sumala ni Bishop Colin Bagaforo, lead convenor sa Catholic Bishops’ Conference of the Philippines kon CBCP Inter-Religious Leaders’ Council for National Transformation ug Obispo sa Kidapawan, himuon ang kalihokan sa People Power Monument, kung asa magsugod ang martsa sa udto paingon sa monumento.
Sigon niini, ang kalihokan usa ka faith-based nga panagtigom nga naggikan sa pag-ampo, pagpamalandong, pagpaminaw, ug hiniusang responsibilidad ngadto sa Diyos, samtang gipahinumdoman ang gobyerno nga ang mga Pilipino angayan sa mas maayong kaugmaon pinaagi sa matinud-anong politika nga nag-alagad sa katawhan, nagpanalipod sa dignidad sa tawo, ug gigiyahan sa hustisya imbes sa kahakog. Gipasiugda usab ni Bagaforo nga kinahanglan mapanubag ug mapriso ang mga nalambigit sa korapsiyon, samtang ipanawagan usab sa grupo ang pagpatuman sa usa ka tinuod ug epektibong balaod batok sa political dynasty.
Giawhag pa sa Bishop ang tanang relihiyosong grupo, civil society organizations, NGOs, educational associations, mga mag-uuma, mangingisda, ug mga mamumuo nga moapil sa rally ug maghiusa sa pag-ampo aron madungog sa Diyos ang tingog sa katawhan, mausab ang sistema sa pagpangulo, ug maminaw ang mga korap sa tingog sa kamatuoran.
