BUTUAN CITY – Misaka pa ngadto sa 87 ang kinatibuk-ang kaso karon sa COVID-19 dinhi sa Caraga Region human nadugangan og 31 ka mga bag-ong kaso ang katapusang natala nga 56.
Sa gihimong virtual presser kaganinang pasado ala-una sa hapon, gikumpirma kini ni Department of Health kon DOH-Caraga regional director Jose Llacuna Jr. numan nadawat sa ilang buhatan ang 130 ka mga resulta sa RT-PCR tests gikan sa Southern Philippines Medical Center sa Davao City.
Sa maong resulta 98 ang nagnegatibo samtang 38 ang nagpositibo apil na niini ang follow-up tests sa mga cases numbers 12, 14, 24, 25, 27, 29 ug 30.
Wala’y labot sa pito ka mga follow-up test results, 31 ang nadugang nga kumpirmadong COVID-19 cases apil na niini ang bag-ong tulo sa dakbayan sa Butuan; tag-usa sa Cabadbaran City ug Buenavista, Agusan del Norte; 4 sa Surigao City; samtang sa lalawigan sa Surigao del Norte mitala og 3 ang lungsod sa Alegria; 2 sa Placer; 8 sa Claver; ug tag-duha sa mga lungsod sa Malimono ug Socorro.
Samtang sa Surigao del Sur , duha ang natala sa lungsod sa Cantilan samtang tag-usa usab sa Tandag City ug Bislig City.
Sa maong mga bag-ong kaso, 27 ang mga asymptomatic kon wala magpakita og bisan unsang simtomas samtang 4 usab ang duna’y mild symptoms ug na-admit na sa managlahing health facilities ning rehiyon.
