BUTUAN CITY – Wala’y matigayong grand Kahimunan competition karong tuiga subay sa kapistahan sa patron sa Brgy. Libertad ning siyudad sa Butuan nga nailang Kahimunan Festival kansa na-andan nang himuon kada-tuig.
Kini ang giklaro ni Libertad Brgy. Kapitan Menchie Rosario sa eksklusibong pakighinabi sa Bombo Radyo Butuan.
Sigon sa kapitan, tungod kini kay wala ma-anticipate sa Kahimunan Council nga pwede na ang dinaghan nga mga tapok-tapok kansa gibawal sa nakalabay’ng duha ka tuig tungod sa COVID-19 pandemic.
Hinuon ugmang adlawa, ilusad alang sa Kahimunan Festival ang opening salvo pinaagi sa ilusad nga mini-Kahimunan kansa salmutan sa mga bata.
Giklaro ni Kapitan Rosario nga kung kaniadto, limitado lamang kini sa mga bata nga residente sa ilang barangay, karon abli na kini sa mga parokya ning siyudad nga gustong musalmot sa kompetisyon ug ning tuiga, walo ka mga contingents ang musalmot.
Himuon kini ugma sa ala-una sa hapon sa gawas nga bahin sa Sto Niño Shrine.
Samtang sa sunod Biernes, Enero 13, himuon usab ang grand motorcade sa imahe sa Sto. Niño nga sundan sa pagbendisyon niini.
Sundan kini sa Higanteng-Higante Sto Niño competition nga duna na usa’y walo ka mga contestants.
Nasayrang giwala usab karong tuiga ang Mutya Hong Libertad tungod sa kakulang sa preparasyon ug sa paggahin og pundo.
Apan anaa ang pipila ka mga sporting events nga maoy gikamingawan sa iyang mga constituents.
