BUTUAN CITY – Kapin sa 12-mil ka mga buhing bala sa AK47 nga iya sa mga rebeldeng New People’s Army kon NPA ang narekober sa operating personnel sa Regional Mobile Force Battalion kon RMFB-13 didto sa bukirang bahin sa Tukbuon, Sitio Lamusig, Brgy. Tungao ning siyudad sa Butuan City pasado alas-kwatro kagahapon sa hapon.
Sigon ni Police Regional Office kon PRO-13 Regional Director BGen Romeo Caramat Jr., upat ka mga containers nga puno sa 12,013 ka mga bala sa AK47 ang ilang nakabot.
Narekober matud pa ang maong mga bala human nila girespondihan ang tawag sa usa ka concerned citizen nga duna’y gipanglubong nga mga bala sa maong dapit.
Ang pagkadiskubre sa maong mga bala timaan lang nga napuno na ang komunidad sa pagsabwag og kagubot sa mga rebeldeng New People’s Army kon NPA.
Alayon niini, gidayeg ni General Caramat ang operating team sa ilang nahimo dayong pasalamat sa katawhang mi-abag sa ilang pwersa aron mamintina ang kahapsay ug kalinaw ning rehiyon.
Alayon niini, gipanawagan gihapon sa heneral ang mga rebeldeng nagpabilin pa sa maong kalihukan nga mutahan na aron malinawong magpuyo uban sa ilang pamilya.
