BUTUAN CITY – Dako ang pagpasalamat ug tumang kalipay ang gibati ni Pinoy boxer Jayson ‘The Striker’ Vayson sa iyang kada-ugan batuk kang Takeru Inoue sa ilang away niadtong Dominggo sa Sumiyoshi Ward Centre sa Osaka, Japan.
Ang iyang pagmantsa sa record ni Inoue isip undefeated boxer sa light flyweight division, mao ang hinungdan nga iyang nadepensahan ang iyang World Boxing Organization kon WBO Asia Pacific Light Flyweight title pinaagi sa unanimous decision sa iskor nga 96-94 , 96-94, ug 97-93.
Sa eksklusibong pakighinabi sa Bombo Radyo Butuan, gipadayag ni Vayson kinsa lumad nga taga-Barangay Sinobong, Veruela, Agusan del Sur, gikonsidera niyang gaba o karma ang kaparutan ni Inoue tungod sa pila ka higayong paglimbong niini ngadto kaniya.
Usa na niini ang paglimbong matud pa ni Inoue sa iyang timbang nga gisundan pa sa paggamit matud pa sa Japanese boxer og mas gaan nga boxing gloves apan nagpasalamat gihapon nga wala’y na-aksidente sa ilang away.
Wala na niya panumbalinga pa ang mga limbong tungod kay naka-focus siya sa iyang target nga da-ugon ang maong away rason nga gikonsidera niyang gaba ang kapildihan ni Inoue.
Dili matud pa lalim ang iyang tulo ka semana lang nga pagpangandam ilabina nga gibalikan siya sa iyang sakit nga pulmonia rason nga iya usab nga gitutukan og maayo ang mga videos sa away sa Japanese boxer.
Ang iyang kada-ugan iyang gipahinungod ngadto sa iyang pamilya kansa iyang gipaningkamutan aron ma-angat sila gikan sa tumang kalisod gawas nga alang usab kini sa namatay na niyang amahan kinsa maoy nangandoy nga mahimo siyang sikat nga boksingero sa umalabot.
