BUTUAN CITY – Gi-andam na ang kasong ipasaka batuk sa gikonsederang high value target ning siyudad sa Butuan human kini nasikop atol sa pag-implementa sa search warrant kagahapon sa hapon.
Giila ni P/ Supt. Rowena Martinez, sa Butuan City Police Office ang suspek nga si Avenswel Dy, 42-anyos, nga taga Barangay Villa Kananga ug kanhe miyembro sa Philippine National Police kon PNP nga na-terminate sa serbisyu tungod gihapon sa pagkalambigit sa ilegal nga drugas.
Nadamay usab sa maong operasyon ang gumagamit sa illegal nga drugas nga nailang si Roger Tenones nga taga Barangay Kamayahan, ning dakbayan nga na-abtan sa maong lugar.
Sa pagsuhid sa panimalay, nakumpiska ang 13 ka sachet nga dunay sulod sa gitoohang shabu lakip na ang caliber 40 nga pistola uban sa 10 ka mga buhing bala ug armas nga OC.
Gibutyag pa ni Matinez nga na-apil sa listahan nila ang maong suspetsado nga panagsa rang mopuyo sa maong lugar. Kamatooran niini, bisan ang iyang mga silingan, wala makaela sa iyaha.
Taas matud pa kini ug kahibalo, tungod kay gawas sa ranggo nga SPO1, usa usab kini sa Certified Civil Engineer.
