BUTUAN CITY – Gi-andam na ang kasong ipasaka batuk sa suspetsadong nasapon sa buybust operation kaganinang alas 3:00 sa hapon sa may Barangay Ong Yu ning siyudad sa Butuan.
Giila ni P/Sr. Insp. Roland Orculio, hepe sa Butuan City Police Station kon BCPS-2, ang suspek nga si Dorjeya Duran Golmatiko, 29-anyos, olitawo, residente sa Burgos extension, Tandang Sora sa samang dakbayan kansa kanhe nang na-prisu tungod gihapon sa maong binuhatan.
Nakuha sa operasyon ang 16 ka sachet diin 5 niini ang dagko, nga dunay sulod sa gitoohang shabu nga gibana-banang motimbang sa 30 gramos.
Sumala pa ni P/Sr. Insp. Orculio, tungod sa ka-demand sa ginadiling drugas, nangisog ang mga tigpayuhot niini nga magpadayon sa ilang bisyu.
Apan hugot matud pa ang ilang monitoring og disedidong wagtangon ang ginadiling drugas base na usab sa mandatu ni Pangulong Rodrigo Duterte.
Samtang gikatingala usab ni Barangay Ong Yu Kapitan Wilbert Hijos, ang nasangpit nga transaksiyun tungod kay ang amo matud pa sa maong suspek, nabilang-go na sa Butuan City Jail.
Gikakurat ni Hijos kung nganung nakahimo pa sa pag-transak ang maong suspek bisan ug anaa sulod sa selda na ang ilang amo.
Giklaro usab sa kapitan nga ang mga kustumer sa suspek dili iyang mga residente base na usab sa hugot nila nga monitoring.
Nagpasalamat nalang si Kapitan Hijos sa kapulisan kansa aktibo diha sa pagsumpo sa illegal nga drugas.(rolan)
