BUTUAN CITY – Andam na ang kampo ni Vice President Sara Duterte nga atubangon ang mga pasangil batok kaniya sa nagpadayon nga impeachment trial human nagsugod ang Senate impeachment court pagpagawas og subpoena aron makuha ang pipila niya ka mga bank ug tax records.
Sumala sa tigapamaba sa defense team nga si Atty. Michael Poa, dili sila supak sa pagpangita sa kamatuoran apan gusto lang nila masiguro nga ang tanang lakang masunod sa Konstitusyon, balaod, ug mga lagda sa korte.
Dugang pa ni Poa, daan na silang andam nga tugotan sa impeachment court ang pagkuha sa mga dokumento ug andam na usab sila nga ipakita nga wala’y basehan ang alegasyon sa gika-ingong unexplained wealth ni VP Sara.
Nasayrang apil sa gipadalhan og subpoena mao ang Bureau of Internal Revenue (BIR), Anti-Money Laundering Council (AMLC), ug pipila ka bangko kondiin gihtagan sila og hangtud sa Hulyo 30 nga deadline sa pagsumite sa gipangayo nga dokumento.
Temporaryong gipahunong ang impeachment trial tungod sa preparasyon alang sa State of the Nation Address (SONA) ni Pangulong Ferdinand Marcos Jr.
Madumdumang nag-atubang si VP Sara sa impeachment case tungod sa mga alegasyong culpable violation of the Constitution, graft and corruption, betrayal of public trust, ug bribery.
