BUTUAN CITY- Mala-umon ang kampo ni kanhi President Rodrigo Roa Duterte nga resolbahon na sa Supreme Court ang mga petisyon kalabot sa daw ilegal nga pagdakop sa kanhi pangulo.
Sa eksklusibong pakighinabi sa Bombo Radyo kang Atty. Salvador Paolo Panelo Jr, gibutyag niini nga gilaomang unsa mang orasa, desisyonan na sa Korte Suprema ang maong kaso.
Kini nunot matud pa sa hangyo kani-adto nga ‘memorandum’ sa pikas kampo nga gipasaka sa mga anak ni Duterte.
Nagtuo si Atty. Panelo Jr. nga ang aksyon o kamanduan sa huwes ang kataposang parte sa proseso adiser soble nga mag-isyu og pinal nga resolusyon.
Ang maong abogado mao ang ‘legal counsel’ ni Veronica ‘Kitty’ Duterte sa petisyong ‘habeas corpus’ nga ilang gipasaka sa Korte Suprema.
Gi-insistar usab sa maong abogado nga problema na matud pa sa ehekutibo o gobyerno nga ma-uli sa nasud si kanhi President Duterte.
Kini ugaling paburan sa Korte Suprema ang ilang petisyong ‘habeas corpus’ ug gi-mandoan ang mga respondents nga ibalik ug ipresenta sa huwes ang kanhi pangulo.
Gawas niini, positibo ang kampo ni Duterte nga aduna gihapoy pamaagi o lakang nga pwedeng himuon ang gobyerno aron mabalik ang kanhi Presidente sa nasud.
Posibel usab matud pa nga makig-coordinate ang gobyerno sa International Criminal Court ug i-insistar nga kayang maghimo og kaugalingong hearing kalabot sa kaso.
Subay sa Rome Statute sa International Tribunal, kini adunay hurisdiksyon lamang kung ang usa ka estado dili makahimo o dili andam nga mopasaka og kaso sa mga indibidwal nga nalambigit sa usa ka krimen.
Sa pagkakaron, nagpadayon pa ang mga petisyon sa Korte Suprema, bahin sa pag-aresto ug pag-extradition ni kanhi Presidente Duterte ngadto sa The Hague, Netherlands.
