BUTUAN CITY – Halos niulbo ang entablado sa Coachella tungod sa pagbalik sa pop superstar nga si Justin Bieber, diin siya ang main performer sa ikaduhang adlaw sa musical festival niadtong Abril 11 sa California, United States.
Kini ang unang major festival performance ni Bieber sukad niadtong 2022, ug giisip ang iyang set nga sinugdanan sa iyang “full comeback” sa live concerts human sa pila ka tuig nga pagpahulay tungod sa iyang kahimtang sa panglawas.
Sa iyang minimalist nga stage setup, gibalik-balik sa singer ang iyang mga karaang hit sama sa Baby, Never Say Never, ug Beauty and a Beat, samtang gipaila usab niya ang bag-ong mga kanta gikan sa iyang albums nga Swag ug Swag II.
Usa sa highlights sa iyang performance mao ang paggamit niya og YouTube playback sa iyang karaang mga video samtang nagkanta siya, nga iyang gitawag og “special night” ug usa ka dugay nang damgo nga natuman.
Sa sunod nga adlaw, mipasundayag usab sila Karol G, FKA twigs, Fatboy Slim, Young Thug, ug ang K-pop group nga BIGBANG.
Gibuksan ang festival niadtong Abril 10 pinaagi sa headlining set ni Sabrina Carpenter, nga giubanan pa og surprise appearances gikan nila Lizzo ug David Lee Roth.
Ang Coachella magpadayon sa sunod weekend nga halos parehas gihapon ang line-up, ug makita usab kini pinaagi sa online streaming platforms.
