BUTUAN CITY – I-represent sa 24-anyos nga si John Paul Tutor nga taga-Barangay Ambago ning siyudad sa Butuan, ang siyudad sa national stage sa himuong Mr. Sphere Philippines 2026 sa Baguio City sugod sa Agusto 18 hangtud 23 ning tuiga.
Dala ni Tutor sa kompetisyon ang iyang advocacy nga “Ilawom sa Kahilom,” nga naghatag og pagtagad sa mga sektor nga kasagarang dili kaayo madungog sa komunidad.
Apil niini ang mga senior citizen, persons with disabilities o PWDs, street children ug mga pamilyang nanginahanglan og dugang nga suporta.
Gusto ni Tutor nga gamiton ang iyang advocacy aron madungog ang tingog sa mga sektor nga iyang girepresentar ug mahimong inspirasyon sa mga batan-on ug gamiton ang ilang talento sa maayong paagi.
Isip pagpangayo og suporta sa mga Butuanons, midalikat sa Sangguniang Panlungsod si Tutor alang sa iyang pag-apil sa Mr. Sphere Philippines 2026.
Gihangyo niya ang mga Butuanons nga suportahan siya pinaagi sa pagboto alang sa Mr. Social Media Award.
