BUTUAN CITY – Gidugok sa bagang duot sa mga job seekers ang job fair sa Department of Labor and Employment kon DOLE-Caraga nga gipahigayon sa may Residential Hall sa Almont Inland Convention Center ning siyudad sa Butuan sa pangindahay nga apil sa mapili-an sa 3,000 ka mga bakanteng trabaho.
Kini subay na sa pagsa-ulog ning adlawa sa ika-121 nga adlaw sa pamuo kon labor day.
Una pang gipahigayon ang balaang misa kaganinang sayo sa buntag sa may St. Joseph Cathedral nga gipangunahan ni Rev. Fr. Chito Butardo.
Nasayrang tulo ka mga kalihukan ang dungan nga gilusad ning adlawa kondiin gawas sa job fair, anaa pa ang paglusad usab sa Kadiwa ng Pangulo Para sa Manggagawa ug ang Tulong Panghanapbuhay sa Ating Disadvantaged/Displaced Workers kon TUPAD Payout.
Sigon ni DOLE-Caraga Director Joffrey Suyao, mi-abot sa 65 ka mga employers ang naghanyag og dul-an 5-mil ka mga trabaho rason nga dakong oportunidad ang job fair alang niadtong wala pa’y trabaho ug gustong mubalhin og trabaho.
Samtang sigon sa job applicant nga si Bowen Morta, sa kadaghan sa mga aplikante, kuwang ang usa ka adlaw nga pag-facilitate kanila bisan og daghan usab ang nag-atiman sa mga dokumento nilang mga job seekers.
Nasayrang ang nakapasar sa interview, gipa-ilalom gilayon sa orientation pagkahapon ug sundan na sa training aron mahitsas na pagsugod sa trabaho.
Tema sa ika-121 ka tuig nga pagsa-ulog sa Labor Day mao ang temang “Pabahay, Bilihing Abot Presyo, Benepisyo ng Matatag na Trabaho para sa manggagawang Pilipino”.
