BUTUAN CITY- Natapos ang katapusang adlaw sa pre-trial conference sa impeachment case ni Vice President Sara Duterte nga wala gihapon mabuksan ang selyadong kahon gikan sa Bureau of Internal Revenue (BIR) nga giingong naglangkob sa iyang mga dokumento sa buhis.
Sumala sa House prosecution panel, ilang gihangyo nga ablihan ug dawaton isip ebidensya ang maong kahon, apan wala kini mahukmi sa pre-trial conference tungod kay kinahanglan pa una nga mosumite og komento ang kampo sa Bise Presidente.
Human niini, ang Senate impeachment court maoy magdesisyon kon mahimong ablihan ug gamiton ang sulod sa kahon isip ebidensya. Bisan pa niini, gipahibalo sa prosecution panel nga andam na ug namarkahan na nila ang ubang ebidensya alang sa pagtaral. Gilauman usab nga magpagula ang Senate impeachment court og pre-trial order nga maglatid sa mosunod nga mga lakang sa impeachment trial.
Si Duterte nag-atubang sa mga reklamo nga may kalabotan sa giingong paglapas sa Konstitusyon, graft and corruption, panuhol, betrayal of public trust, ug uban pang seryosong alegasyon, samtang nagpadayon ang iyang kampo sa paghangyo nga ibasura ang maong kaso.
