BUTUAN CITY- Mingsaka na sa 21 ang ihap sa namatay sa nahugnong 9 ka andana nga building sa Angeles City, Pampanga.
Sumala sa Bureau of Fire Protection kon BFP Central Luzon, narekober ang patay’ng lawas sa masusu sa Quadrant 2 sa disaster site alas-sais uno sa gabii, samtang nagpadayon ang search and retrieval operations.
Sigon ni Fire Superintendent Maria Leah Sajili, Regional Public Information Officer sa BFP-Central Luzon, nga wala pa naidentify ang identity sa bata samtang gipa-ilawom kini sa imbestigasyon sa Scene of the Crime Operatives kon SOCO.
Una niini, minggawas ang mga taho gikan sa pipila ka-nakaluwas nga posibleng adunay mga bata sa construction site tungod didto matud pa temporaryong gipapuyo sa mga trabahante ang ilang pamilya.
Sa pagkakaron, gisuta pa sa mga awtoridad kung ang bata lakip sa mga nagpuyo sa lugar.
Ang patay’ng lawas sa bata dugang sa mingdakong listahan sa mga namatay nga gilangkoban sa mga construction worker, mga tindero, usa ka turistang Malaysian nga nagmintinar sa silingang hotel ug uban pang biktima.
Sa kasamtangan padayon ang clearing operations sa mga responder sa paglaom nga aduna pay mga biktima ilalom sa nahugno.
