BUTUAN CITY – Kamulo karon ang konstrusyon sa duha ka mga bag-ong tulay ning siyudad sa Butuan aron ma-abagan na ang pagtabok sa mga sakyanan padulong ug gikan sa sentrong bahin ning siyudad.
Kini ang giklaro ni Rey Desiata human gipadayag sa Butuan City District Engineering Office sa Department of Public Works and Highways nga magkinahanglan na og bag-ong tulay ang siyudad aron malikayan ang karambola sa mga sakyanan sama sa nahitabo sa Macapagal Bridge.
Sa eksklusibong pakighinabi sa Bombo Radyo Butuan, gibutyag sa konsehal kinsa chairman sa Committee on Urban Planning and Infrastructure sa Sangguniang Panlungsod, nga padayon ang konstruksyon sa ikatulong tulay ning siyudad kansa magsilbing alternate bridge gikan sa Brgy. Bilay patabok sa Brgy. Dulag nga gila-umang mahuman sa hinapos ning tuiga o kaha sa unang bahin sa tuig 2024.
Samtang sa sentrong bahin ning siyudad, gi-propose matud pa ni Mayor Ronnie Vicente Lagnada ang pagmontar og iconic bridge gikan sa Brgy. Lumbocan nga mukutay ngadto na tali sa Brgy. Banza ning siyudad ug lungsod sa Magallanes sa Agusan del Norte.
Musumpay matud pa kini sa logistical highway sugod sa Brgy. Taguibo lusot sa Tiniwisan, Taguibo, Cabcabon, Bobon, Banza padulong sa lungsod sa Magallanes ug sa Lumbocan lapos na sa Nasipit Port isip kabahin sa coastal road project aron ma-decongest ang dagan sa trapiko sa sentrong bahin ning siyudad.
Gi-propose matud pa nga himuon kining 8-lanes apan 4-lanes lang ang na-aprubahan hinuon duna’y probisyon nga himuon ra kining six ngadto sa 8-lanes sa ngadto-ngadto kansa punduhan sa Japan International Cooperation Agency kon JICA.
