BUTUAN CITY- Gitakda na sa International Criminal Court ang ikaduhang status conference sa kaso ni kanhi President Rodrigo Duterte nga may kalabotan sa giingong crimes against humanity tungod sa kampanya batok sa ilegal nga droga.
Sumala sa public order nga gipagawas sa ICC, himuon ang pagdungog sa Hunyo 23, 2026, ug tutukan niini ang daghang importante nga isyu lakip ang deadline sa pagsumite sa mga obserbasyon sa Expert Panel Report, protocol sa pagdumala sa confidential information, limitasyon sa gidak-on sa Prosecution Trial Brief, iskedyul sa umaabot nga status conferences, ug mga pampublikong pahayag sa mga abogado.
Ang unang status conference nahitabo niadtong Mayo 27, 2026, diin nakita sa korte ang panginahanglan sa dugang nga sesyon aron mas lawom nga hisgutan ang proseso sa kaso. Bisan og bukas sa publiko ang maong pagdungog, gipasidan-an sa ICC nga mahimo kini nga himuong pribado sa pipila ka bahin aron mapanalipdan ang sensitibong impormasyon ug seguridad sa mga saksi. Gikumpirma usab sa korte nga dili motambong si Duterte human niining gi-waive ang iyang katungod sa personal nga pag-apil sa maong hearing.
