BUTUAN CITY – Nagpagawas og opisyal nga pamahayag ang kadumalahan sa Father Saturnino Urios University may kalabutan sa pagsuspende sa face-to-face nga klase sa nakalabay nga adlaw human nakadawat og hulga online ang unibersidad.
Sigon ni university president Father Randy Jasper Odchique, kabahin ang maong desisyon sa pagpakusog sa pro-active ug security measures aron mahatagan ang unibersidad og higayon nga matubag ang sitwasyon og mapahugtan ang safety protocols.
Ang nasangpit nga panghitabo, natagad pinaagi sa closed coordination kauban ang Butuan City Police Office ug ang City Social Welfare and Development.
Sumala pa ni Fr. Odchique, luwas og well-guarded ang unibersidad og nagpatuman sila’g facial recognition protocol sukad pa niadtong Hunyo ning tuiga samtang ang security checks gihimo matag-adlaw.
Nagpatuman usab sila og heightened security sa parehong Morelos og College Campus diin dugang security equipment ang gi-deploy aron mapahugtan pa ang seguridad sa tunghaan.
Hinanaling psycho-social support ang nahatag usab sa na-apektuhan sa sitwasyon.
Alayon niini, gi-awhag sa pari nga likayan ang pag-share o pag-forward sa dili beripikadong impormasyon tungod kay makamugna lang kini og alarma og kahadlok.
