BUTUAN CITY – Gikumpirma ni Land Transportation, Franchising and Regulatory Board kon LTFRB-Caraga regional director Ma. Kristina Cassion nga gipa-nullify na usab sa management sa Diamond Transport Service Cooperative kon DATSCO pagpanguna ni chairman Evangelus ‘Evans’ Lawenko ang gitakda nang general assembly sa Cooperative Development Authority kon CDA karong Miyerkules, Agusto 25.
Ang maong petsa mao na’y final nga nasabutan atol sa ilang tigom niadtong Agusto 12 human nga gipugos na sa CDA ug sa LTFRB-Caraga ang pagpahigayon na niini aron maka-renew na sila sa ilang nag-expire na nga provisional authority.
Sa eksklusibong pakighinabi sa Bombo Radyo Butuan, gipadayag ni Director Cassion nga dugay nang na-expire ang provisional authority sa DATSCO dili lang sa ilang mga modern jeepneys ning siyudad ug sa mga taksi kondili apil na kadtong atua sa laing lalawigan ning rehiyon sa Caraga.
Gipasabot sa opisyal nga dili sila maka-renew sa ilang provisional authority tungod kay wala sila’y certificate of good standing kon CGS nga ma-isyu lang kung duna sila’y makuhang certificate of compliance kon COC gikan sa CDA ug isubmite ngadto sa Office of Transportation Commission kon OTC uban sa ilang financial documents.
Ang mas gikalibgan nila karon uban sa mga membro mao ang pagpahigayon na hinuon og sequential assembly sa nagkada-iyang lalawigan ning rehiyon imbes nga mas maayo ang usa lang ka tibuok nga general assembly aron usa lang ang gaso ilabina sa venue sa rasong 159 na lang ka mga regular members ang mahimong makatambaong niini.
